ܔْށMiss Butterflyܔْށ

 

ثلاث ساعات اتقلب على السرير مو راضي يجيني النوم ليه ماادري؟؟ رغم اني صاحية من الصباح بدري لحد الساعة اربع الفجر مو قادرة أنام … يمكن قلق بس من ايه وليه وعلى مين ماادري؟؟؟ ويمكن مبسوطة عشان أشياء كثيرة حصلت لي … استمعت لأشرطة د.طارق السويدان رتب حياتك وبدأت اقرأ كتاب كيف تخطط لحياتك لي د.الراشد وأشكر المدون ثامر الطويرقي لأنه نصحني بسماع الأشرطة وقراءة الكتاب لأنها بجد أفادتني كثير

 

أو يمكن عشان بكرة حأكلم أبرار ما كلمتها من شهر تقريبا يالله مررررررررررررة مشتاقة لها

 

نفسي أروح الحرم وينبع بجد مشتاقة لينبع ولهواها …ابغى طريقة أقنع فيها ابويا اننا نروح … يارب نروح في اجازة الحج لما تحب أرض لأنك تنتمى لها تحس الكون كله ما يسوى يوم تجلسه فيها

 

امممممم كرهت مدونتي قبل فترة ومازلت أكرهها أفكر أغيرها لووووول مدري متى أستقر … أيش رايكم اشقلب على الووردبريس واترك عرب ووردبريس وإلا خليني هنا أحسن ؟؟ صراحة طفشت منها ابغى أغير .. اشتقت لمدونتي فجيران على قد ما كرهتها وطفشت من استهبالها لكن لها معزة لأني مريت بحالات نفسية كثير وكانت هي الملجأ

 

نفسي أدرس ويكون عندي دوام في الصباح اصحى الساعة خمسة اصلي واجهز واشرب شاهي واروح مع اخواتي وأعصب إذا اتأخرو وأعيش المغامرات مع السواق التوحفة ياما كنا حأنسوي حوادث مميته بسببه وكل ما ركبت السيارة اقول لجولي بدأت لعبة السيارات اللي في البلايستيشن بجد احس سواقته كأنه يلعب وطوال الطريق معرضين للموت مشكلة

 

مدري ليه اتذكرت لعبنا بالطين في حديقتنا الساعة ثلاثة الظهر تحديدا قبل يومين سونة بنت خالتي تتذكر كيف هبقو هيه وأحمد والأذية اللي سووها في الجيران .. سونة وأحمد أخوان بالرضاعة وإلى الآن سونة ما تتجرأ تقابل أبويا امممم غريبة حكاية الرضاعة أوقات تسوي مشاكل زي خالتي كانت حتتزوج خالي لكن ربي ستر

 

لما تعملو إنجاز ويجي شخص وينتقد جانب ضيق من الأمر ويحصرها في الجانب الأخلاقي ويحاول ينبهنا عشان يالطيف ما ننحرف وهوا مو داري عن الهرجة بس يفتي من عنده ايش تتصرفو معاه بصراحة انا اديته اشكل محترم اريح لي ويمكن لأني حسيت الإهتمام بأمور زي كذا شئ تافه وغبي

 

من فترة طويلة ما صرت أكتب خواطر ؟ أوقات أحتاج إني أكتب لكن ما أقدر أحس بعجز أمسك القلم أو أجلس قدام شاشة الكمبيوتر ساعة وما أقدر اركب كلمتين على بعض أوقات أكون محتاجة إن أكتب لكن التعبير يخونني

 

بدأت أحس في ناس تغتر بنفسها وماأدري ليه يعني …. وإلا بلاشي ماابغى أكمل دي النقطة

 

أحس نفسكم تمسكون فمي وإلا تربطون يدي عشان ما اكمل خلاص طيب اقفلو الصفحة لا تكملون

 

شكرا لأنه لديك القلب الكبير والبال الطويل لتكملة قراءة أساطيري << جملة متعوب عليها لوول

 

الأسبوع اللي فات نمت تحت ضوء القمر توضيت لصلاة العشاء وأخذت السجادة وشرشف الصلاة وطلعت الحوش وظلمت الدنيا وصليت واتمددت وجلست اتأمل في النجوم والقمر كان ليلتها قماري مرة حلو الجو هدوء ونمت … طبعا الناموس ما قصر وأخذ نصيبو مني كانت نومة حلوةيمكن ساعتين ودخلت غرفتي كملت النومة

خلنا مني ..طمني عليك …ماأنام الليل من خوفي عليك ..أنت طيب هذا هو اللي يهم … أنت طيب وغير هذا ما يهم

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

This entry was posted on الأثنين, نوفمبر 5th, 2007 at 11:46 ص and is filed under يومياتي. You can follow any responses to this entry through the RSS 2.0 feed. You can leave a response, or trackback from your own site.